GOGOLIO - ama Cara Bikinnya

Mungkin ampir semua daerah di Indonesia udah pada kenal ama punya jenis maenan bocah nyeng dikeja dari batang padi ini, khususon bocah-bocah nyeng tinggalnya di daerah-daerah pesawahan. Nyeng ngelaenan mungkin cumen nama sebutan aja kerna behasa sunggel ilayah di Indonesia juga emang pada laen. Jogrogan maenan ini juga kalih kagak semuanya sama percis, tapi cara maeninnya kapranya sama, ya'eni ditiup.

Contonya ada macem suling dari batang padi nyeng kapra dimaenin di ilayah Mandailing, namanya Uyup-Uyup. Atawa ada juga nyeng disebut Olo-Olo, Oli-Oli dikenal dalem Kamus Behasa Aceh, ada Puput nyeng disebut dalem cerita Ahmad Tohari dalem bukunya Ronggeng Dukuh Paruk, dalem Kamus Behasa Indonesia disebut Bangsi, di Betawi disebut Gogolio. Tapi kapranya di Indonesia disebut pake nama biasa aja, ya'eni Seruling Batang Padi.

Kapranya, maenan ini banyak kedenger suaranya kalu pas tempo wayahnya lagi panen atawa udah deket-deketnya waya musin motong (panen). Kerna maenan tiup ini emang jamaknya dikeja dari batang padi nyeng udah gede. Sebenernya maenan ini bisa juga dikeja dari bahan nyeng laen nyeng macemnya ampir percis ama batang padi, tapi kapranya juga emang dikeja dari batang padi.

Bocah-bocah kecil dari jaman dulu sampe sekarang paling demen ama nyeng namanya lagu atawa canyian. Mangkanya bocah-bocah sering ngarang canyian dewek manting maenannya. Kerna ni canyian sering dinyanyiin sunggel maenin suling batang padi ini, ninggangnya jadi dah semacem kebiasaan nyeng jadi "kudu". Artinya jadi kurang "nyeni" kalu kagak ada canyian ini. Belakangan, bocah-bocah jadi ngerasa "kudu" nyanyiin canyian tadi kerna katanya, kalu canyian ini kagak dipake, entarnya suling maenan ini suaranya jadi kagak cakep atawa juga kagak nyanter. Canyian ini ninggangnya dijadiin semacem jampe/jampi/mantra nyeng kudu dicanyiin sunggel mbikin suling batang padi ini.

Conto jampe maenan Olo-Olo, namanya Jok Omping :

"Jok jok Omping, terojok padi mudo, ntah bilo kito ngomping ntah esok ntah luso".

Artinya Kira-kira :

"Jok jok Emping, tertumbuk padi muda, entah kapaan kita membuat emping, entah besok entah lusa".

Conto jampe maenan Gogolio :

"Gogoliii, gogoliooo... mentariii, mentariooo... saya minta suara nyeng paling nyanter, kalu kagak, entar saya getok pake gayung, tok-griii...".

Di sini, Betawi Bekasi Bersatu mao ngunjukin cara mbikin Gogolio nyeng kapra dimaenin ama bocah-bocah di ilayah Betawi. Kami pakein gambar secara urut supaya lebih gampang diartiin.

Begono dah kira-kira. Mudah-mudahan bisa ngobatin kangen ama maenan ama kebiasaan bocah-bocah tempo-tempo dulu.